Awto sa gunman sa Mandaue road rage nakuha sa CCTV

·2 min read

Nakuha sa National Bureau of Investigation (NBI) Mandaue City Cebu District Office ang video footage nga nagpakita sa sakyanan nga gituohang gigamit sa gunman nga namusil-patay niadtong Agusto 8, 2022, sa usa ka overseas Filipino worker (OFW) sa Barangay Subangdaku, Mandaue City.

Si NBI-Mandaue agent-in-charge Arnel Pura nitug-an sa SunStar Cebu nga nakuha nila ang kolor, partial information sa plate number sa sakyanan, ug direksyon niini human pusila si Roberto Estandarte, 45, samtang nagmotorsiklo sila sa iyang kapuyo niadtong Agusto 8.

Ang iyang kapuyo maoy back ride dihang si Estandarte gipusil sa gunman nga nagmaneho og awto. Ang hitabo gituohang resulta sa road rage.

Naigo sa walang dughan si Estandarte ug patay nang niabot sa ospital.

Wa maunsa ang iyang kapuyo samtang ang suspek daling nisibat human sa hitabo.

Matod sa kapuyo nga ang sakyanan 2019-2021 Toyota Vios model, nga naay faded metallic gray color nga naay plate number nga nagsugod sa 5, 1 sa tunga, ug 3 isip last digit.

Matud pa ni Pura nga ila na karong gisubay ang sakyanan gamit ang maong mga impormasyon.

Iyang gihangyo ang gunman nga mo-surrender sanglit i-trace gyud sa NBI ang iyang sakyanan bisan unsa pa.

“There is only one lacking number as the plate number should be four. So, mas maypag mo surrender na lang sa NBI Mandaue kay eventually ma trace man japun siya,” matod ni Pura.

Sila si Estandarte ug iyang kapuyo padulong nang mopauli sa ilang gipuy-an.

Dunay awto nga wa ni-signal nga nitadlas sa flyover nga hapit nila nadasmagan busa ilang gikasab-an ang driver.

Nipadagan ang driver, apan nihunong sa unahan kay gituohang sila gipaabot.

Sa pagkatungod sa managkapuyo, gipusil si Estandarte sa gunman gikan sa bentana sa awto.

Kadtong posibleng nakaila sa gunman pinaagi sa footage gitambagan nga mokontak sa NBI-Mandaue pinaagi sa pagtawag sa 4366819 ug 09178951080, dugang ni Pura.