Babaye nanghablot og bag sa Traslacion gisikop

GISIKOP sa kapulisan ang usa ka babaye nga nanghablot og bag sa usa ka deboto atol sa Traslacion sa atubangan sa National Shrine of Saint Joseph sa Mandaue City alas 9:35 sa buntag, Biyernes, Enero 17, 2020.

Base sa taho sa kapulisan, si Liezel Ferolino, 21, taga Barangay Laray San Roque, Talisay City, gibira ug gidagan ang bag ni Jovelyn Caleza 35, taga Barangay Labogon, Mandaue City.

Wala magdahom ang biktima samtang nagtan-aw siya sa nagpadayon nga Traslacion sa duha ka bulahang imahe sa Birhen sa Guadalupe ug Señor Santo Niño sa atubangan sa National Shrine of Saint Joseph, gilabnot ang bag niini ug ang suspek daling nakadagan paingon sa P. Gomez Street paingon sa Colonnade Supermarket.

Daling naalarma ang nagpalibot nga gi-deploy nga kapulisan alang sa Traslacion og gigukod kini si Ferolino.

Naapasan ug nasikop ang maong suspek sa kapulisan sa Dakbayan sa Mandaue ug nakuha balik ang bag sa biktima nga aduna'y kuwarta, cellphone ug uban pang mga personal nga gamit.

Kasamtangang gi-imbestigar sa Investigation and Detective Management Branch sa Dakbayan sa Mandaue si Ferolino. (KFD)