Barko gikan sa Camotes padung sa Danao mi aso; giguroy pabalik

·2 min read

NAKAMUGNA og grabeng kahadlok sa mga pahero sa barko ang kalit nga pag-aso sa makina alas 9:00 sa Sabado sa buntag, Oktubre 2, 2021, sa kadagatan sa Sitio Maudlong, Brgy. Himinsulan, San Francisco, mga isla sa Camotes.

Ang Mica Mari Uno, gipanag-iya sa Jomalia Shipping Corporation, maoy niaso samtang nagbiyahe padung sa Dakbayan sa Danao, amihanang Sugbo.

Si Police Senior Master Sgt. Fil Florentino sa San Francisco Police Station nga nahinabi sa Superbalita Cebu nagkanayon nga ang Mica Mari Uno naglawig gikan sa Consuelo Wharf sa Barangay Consuelo, San Francisco alas 8:30 sa buntag padulong sa dakbayan sa Danao nga wala pa matino kon pila ang mga sakay sa barko.

Matod pa ni Florentino nga mga 30 minutos human nakanabigar ang barko, kalit nga miulbo ang baga nga aso gikan sa makina niini.

Gumikan niini, daling gipawong sa mga tripolante ang makina aron dili masunog.

Nakamugna kini og kabalaka sa mga pasahero nga nagtuo nga nasunog ang makina.

Ang unang impormasyon gikan sa 911 Malacañang nga dunay barko mga miaso o nasunog.

Ang headquarters sa Cebu Police Provincial Office (CPPO) milabay dayon sa impormasyon ngadto sa kapulisan ingon man sa Philippine Coast Guard.

Nasuta mga mga alas 10:30 unta sa buntag sa Sabado maabot sa Danao City ang barko.

Apan wala na madayon, giguroy kini sa kauban nga barko nga Mica Mari 3 paingon balik sa San Francisco.

Sa pagsuwat ning taho, wa pay pamahayag nga giluwatan ang mga tagdumala sa Jomalia.

Niadtong Marso 2020, ang operation sa Mica Mari 3 gisuspenso sa Maritime Industry Authority (Marina) 7 human mapalyar ang makina niadtong Marso 2, 2020 samtang naglawig gikan sa mga isla sa Camotes.

Wa hinuoy naunsa atol sa insidente.

Ang Marina nakahukom sa pagsusi sa tanang mga barko sa Jomalia sa miaging tuig kay di kadto unang higayon nga nahitabo.(GPL)

Our goal is to create a safe and engaging place for users to connect over interests and passions. In order to improve our community experience, we are temporarily suspending article commenting