Kapitolyo mopadala og ayuda sa Medellin, Daanbantayan

MAY mapaabot nga ayuda ug tabang ang duha ka lungsod nga mipaubos na sa state of calamity, ang lungsod sa Medellin ug Daanbantayan.

Kini mao'y gipahibalo ni Cebu Governor Gwendolyn Garcia atol sa pagbisita niini sa duha ka lungsod nga naapektohan sa Bagyong Ursula.

Lakip sa gisaad niini mao ang tabang sa pag-ayo sa mga imprastraktura ug kadalanan nga nadaot sa bagyo.

Sa uwahing datos sa Lungsod sa Medellin, moabot sa P41,280,065.76 ang natala nga gibiling danyos sa Bagyong Ursula sa lungsod sa Medellin sa padayon nga assessment sa Local Disaster Risk Reduction and Management Office (LDRRMO) sa pasiunang 15 ka mga barangay sa nahisgutang lungsod.

Moabot sa 2,542 ka mga panimalay ang partially damaged ug 98 usab ang totally damaged sa Medellin.

Sa kinatibuk-an, natala nga 15,255 ka mga indibidwal o 3,051 ka pamilya ang gibakwit ug giingong apektado sa bagyo.

Lakip sa natala nga may labing kadaot sa lungsod ang agrikultural nga bahin sama sa katubhan ug kahumayan ingon man ang livestock and poultry; 35 ka mga fishing boats ang partially damaged ug tulo ang totally damaged.

Gipahibalo ni Mondigo nga moabot sa P2,530,178.58 ubos sa Quick response fund ang magamit sa Medellin isip ayuda sa mga apektadong residente. (ANV)