NBI moimbestigar sa rambol; langyaw mokiha

Human sa pagsugod sa kapulisan sa dakbayan sa Sugbo sa pag-imbestigar sa giingong pagkulata sa usa ka inilang langyaw nga international chef sulod sa usa ka bar sa Brgy. Kasambagan, dakbayan sa Sugbo, ang tag-iya sa establisemento ipatawag usab sa National Bureau of Investigation (NBI) Central Visayas.

Atol sa live press conference ni Cebu Governor Gwendolyn Garcia sa Disyembre 29, 2022, iyang gipadayag ang iyang kasuko batok sa management sa F and Bar Cafe diin nahitabo ang karambola nga nisangko sa pagkabun-og ni Michelin star chef Jason Atherton.

Niluwat og pamahayag ang gobernador pinaagi sa personal social media post kabahin sa iyang kasagmuyo sa mga nagduma sa restobar human giingong gitabangan pagkulata si Atherton sa mga personnel niini.

Hinuon, gihimakak na kini sa management sa usa ka pamahayag kay sila pa ang ningpatunga aron maundang ang karambola.

Subay niini, gitug-an ni Garcia nga gihangyo niya ang NBI-Cevro sa pagsusi sa hitabo, lakip usab ang pagtan-aw sa mga closed circuit television (CCTV) footages aron matino ang tinuod nga panghitabo.

Sa uwahing kalamboan, giluwatan na og subpoena sa NBI-7 ang tag-iya sa restobar aron makapadayag sa ilang habig.

Gidugang usab sa buhatan nga gikinahanglan nga dad-on niini ang tanang mga kopya sa CCTV footages gikan sa Disyembre 23 sa gabii hangtod na sa Disyembre 24 sa kaadlawon aron masusi ang panghitabo.

Gikatakda ang panagtagbo sa NBI-7 sa Miyerkules, Enero 4, 2023.

Matud ni Garcia nga bisan pa man og nahitabo ang kagubot sa dakbayan sa Sugbo, apan iya lang gituman ang iyang gipanumpaan isip gobernador aron pagprotehir sa reputasyon sa Sugbo, ilabi na sa mga turista ug bisita.

“I am responsible for Cebu. I am responsible for the image and reputation of Cebu and I will fulfill my duty as governor of this beloved island of Cebu,” matud ni Garcia.

Taliwa sa hitabo, iyang giawhag ang mga langyaw nga padayong mobisita sa Sugbo.

“So my beloved Cebuanos, beloved Filipinos and to all foreigners from other countries that may plan to come and visit Cebu, rest assured that if any injustice were to be committed against you even outside the jurisdiction of the province of Cebu I will stand by you,” matud ni Garcia.

PULIS

Sa alas 2 sab sa Disyembre 30, 2022 sa hapon, ang mga bar owner ug managers sa 88th Avenue sa Barangay Kasambagan pakigtagboan sa Cebu City police.

Matud ni Police Colonel Ireneo Dalogdog, hepe sa kapulisan sa dakbayan sa Sugbo, nga ilang imbitaron si Cebu City Vice Mayor Raymond Alvin Garcia, Konsehal Phillip Zafra, chairman sa Cebu City Peace and Order Council, ug kadagkoan sa Business Permit and Licensing Office (BPLO).

Usa sa ilang hisgotan ang nahitabo sa langyaw aron dili na masubli pinaagi sa pagbutang og blue guards, lakip na ang pagmontar og CCTV.

Gihimo na nila kini, sigun ni Dalogdog, sa mga imnanan sa Panagdait nga sakop gihapon sa Barangay Kasambagan, diin sunodsunod ang mga rambol sa mga batan-on.

“Mag dialogue mi. Unya ang isa sa mga requirements nila kining sa mga business establishment kinahanglan duna gyud tay CCTV nga naka install para kon dunay mga panghitabo nga susama niana, dali ra nato makita kon kinsay nag-una-una sa maong insidente,” matud ni Dalogdog.

Si Police Major Eraño Regidor, hepe sa Mabolo Police Station, nagkanayon nga niadtong Disyembre 24, 2022 sa ala 1 sa kaadlawon, gialarma sa iyang mga personnel ang F. Café and Bar tungod sa kagubot.

Ilang gipangdala ang mga nalambigit sa police station aron i-blotter ang insidente, apan nagkasabot ang duha ka mga kampo nga magpinasayloay kay dili na mopasaka og kaso ang biktima. Gi-turnover kini nila sa barangay aron didto sila mag-uli sa maayong kabubot-on.

Apan gipasabot ni Regidor nga wala mohunong ang ilang imbestigasyon.

Gani bisan na settle ang duha ka mga kampo, nag request dayon sila og kopya sa CCTV sa establisemento aron masayran nila asa nagsugod ang kagubot.

Kay kon makahukom ang langyaw ug pikas kampo nga mopasaka og kaso, andam sila nga mo assist.

Niadtong Miyerkules sa buntag, Disyembre 28, 2022, nibisita sa ilang police station si Atherton uban sa business partner niini aron ipadayon ang kaso nga ipasaka batok sa ningkulata kaniya.

Kasong frustrated homicide giingong ang giandam nga kaso sa complainant base usab sa pangangkon sa abogado niini tungod sa paggamit og botelya sa gireklamo ni Atherton.

“Ang complainant (Atherton) niadto gahapon kay mo pursue na sila sa kaso nila against sa pikas. Initially pud kon ang other parties pud ug kon moadto sad sila, ato sad sila i-entertain,” matud ni Regidor.